ham ko sambhaaltaa koi kyaa raah-e-ishq mein — Aziz Hyderabadi

vo ye kah kar daagh dete hain mujhe
phuul se pahle samar aate nahin

mushkil hai imtiyaaz-e-azaab-o-savaab mein
piitaa huun main sharaab milaa kar gulaab mein

koi rusvaa koi saudaai hai
ik jahaan aap kaa shaidaai hai

zor qismat pe chal nahin saktaa
khaamushi ikhtiyaar kartaa huun

us ne sun kar baat meri Taal di
uljhanon mein aur uljhan Daal di

ayaan yaa nihaan ik nazar dekh lete
kisi surat un ko magar dekh lete

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

kyaa isi bhuul ko kahte hain mohabbat kaa zavaal
ab mujhe yaad nahin saalgirah bhi teri

ham ko aapas mein mohabbat nahin karne dete
ik yahi aib hai is shahr ke daanaaon mein

gham agarche jaan-gusil hai pa kahaan bachein ki dil hai
gham-e-ishq gar na hotaa gham-e-rozgaar hotaa