tasvir kyuun dikhaaein tumhein naam kyuun bataaein — Bekhud Dehlvi

paDhe jaao 'bekhud' ghazal par ghazal
vo but ban gae hain sune jaaeinge

huron se na hogi ye mudaaraat kisi ki
yaad aaegi jannat mein mulaaqaat kisi ki

raqibon ke liye achchhaa Thikaanaa ho gayaa paidaa
khudaa aabaad rakhe main to kahtaa huun jahannam ko

mohabbat aur majnun ham to saudaa is ko kahte hain
fidaa lailaa pe thaa aankhon kaa andhaa is ko kahte hain

bole vo muskuraa ke bahut iltijaa ke baad
ji to ye chaahtaa hai tiri maan jaaiye

maut aa rahi hai vaade pe yaa aa rahe ho tum
kam ho rahaa hai dard dil-e-be-qaraar kaa

kahnaa hi miraa kyaa hai ki main kuchh nahin kahtaa
ye bhi tumhein dhokaa hai ki main kuchh nahin kahtaa

dhokaa thaa jis pe mauj-e-nasim-e-bahaar kaa
ik sail-e-be-panaah thaa barq-o-sharaar kaa

vaise kyaa ghaTiyaa si shai hai ye tamannaa kaa fareb
aap jaison ko bhi ham jaise taras jaate hain

fareb-e-raushni mein aane vaalo main na kahtaa thaa
ki bijli aashiyaane ki nigahbaan ho nahin sakti

mauj-e-takhayyul gul kaa tabassum partav-e-shabnam bijli kaa saaya
dhokaa hai dhokaa naam-e-javaani is ko javaani koi na samjhe

miri ghazal mein kisi bevafaa kaa zikr na thaa
na jaane kaise tiraa tazkira nikal aayaa