dhokaa thaa jis pe mauj-e-nasim-e-bahaar kaa — Mustafa Rahi

shaayad hi raas aae mujhe aish-e-marg bhi
'raahi' gham-e-hayaat kaa maaraa huaa huun main

allaah tere haath hai khuddaariyon ki laaj
daanista haadsaat se Takraa gayaa huun main

be-khudi mein shaan-e-khuddaari bhi hai
khvaab mein ehsaas-e-bedaari bhi hai

dil dhaDaktaa hai sitaaron kaa yahaan
uf ye duniyaa kis qadar taarik hai

na samjhaa koi asraar-e-mohabbat
jo samjhaa kuchh dil-e-naadaan samjhaa

dekhiye kab tak yahi haalat yahi aalam rahe
dil ki har dhaDkan ye kahti hai ki vo aane ko hain

ghunchon kaa fareb-e-husn tauba kaanTon se nibaah chaahtaa huun
dhoke diye hain doston ne dushman ki panaah chaahtaa huun

na karein aap vafaa ham ko kyaa
bevafaa aap hi kahlaaiyegaa

ham ne aalam se bevafaai ki
ek maashuq-e-bevafaa ke liye

aur kyaa mafhum hogaa khud-farebi ke sivaa
tishnagi jalte hue suraj pe gar zaahir karein

bahut fareb se ham vahshiyon ko vahshat hai
hamaare dasht mein 'naasikh' kahin saraab nahin

ajab nahin ki ye dariyaa nazar kaa dhokaa ho
ajab nahin ki koi raasta nikal aae