mujhe ye zid hai kabhi chaand ko asiir karun — Shahbaz Khwaja

yuun to mumkin nahin dushman mire sar par pahunche
pahre-daaron mein koi aankh jhapak jaataa hai

mataa-e-jaan hain miri umr bhar kaa haasil hain
vo chand lamhe tire qurb mein guzaare hue

safar kaa ek nayaa silsila banaanaa hai
ab aasmaan talak raasta banaanaa hai

vo ek tu ki tire gham mein ik jahaan roe
vo ek main ki miraa koi rone vaalaa nahin

ik aisaa vaqt bhi sahraa mein aane vaalaa hai
ki raasta yahaan dariyaa banaane vaalaa hai

kisi ne dekh liyaa thaa jo saath chalte hue
pahunch gai hai kahaan jaane baat chalte hue

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

aasaan nahin insaaf ki zanjir hilaanaa
duniyaa ko jahaangir kaa darbaar na samjho

ham ne maanaa ik na ik din lauT ke tu aa jaaegaa
lekin tujh bin umr jo guzri kaun use lauTaaegaa

paDosi piTte hain jab dariche aur darvaaze
main Thumri chheD detaa huun taraanaa chhoD detaa huun

main ghar ko phunk rahaa thaa baDe yaqin ke saath
ki teri raah mein pahlaa qadam uThaanaa thaa