miri maili hatheli par to bachpan se — Faragh Rohvi

usi taraf hai zamaana bhi aaj mahv-e-safar
'faraagh' main ne jidhar se guzarnaa chaahaa thaa

ham se tahzib kaa daaman nahin chhoDaa jaataa
dasht-e-vahshat mein bhi aadaab liye phirte hain

mujh mein hai yahi aib ki auron ki tarah main
chehre pe kabhi dusraa chehraa nahin rakhtaa

khuub nibhegi ham donon mein mere jaisaa tu bhi hai
thoDaa jhuTaa main bhi Thahraa thoDaa jhuTaa tu bhi hai

kisi ne raah kaa patthar hamin ko Thahraayaa
ye aur baat ki phir aaina hamin Thahre

yaaro hudud-e-gham se guzarne lagaa huun main
mujh ko sameT lo ki bikharne lagaa huun main

main baDaa ho gayaa huun magar bachpanaa
mere dil se kabhi bhi gayaa hi nahin

zulm sahte rahe shukr karte rahe aai lab tak na ye daastaan aaj tak
mujh ko hairat rahi anjuman mein tiri kyuun hain khaamosh ahl-e-zabaan aaj tak

almaari mein tasvirein rakhtaa huun
ab bachpan aur buDhaapaa ek hue

na mizaaj-e-naaz-e-jalva kabhi paa sakin nigaahein
ki ulajh ke rah gai hain tiri zulf-e-kham-ba-kham mein

main to is vaaste chup huun ki tamaashaa na bane
tu samajhtaa hai mujhe tujh se gilaa kuchh bhi nahin

abhi safar mein koi moD hi nahin aayaa
nikal gayaa hai ye chup-chaap daastaan se kaun