apni taarif sun ke khush mat ho — Farhan Dil

aaine se banaae rakh har dam
aaina shakhsiyat badaltaa hai

ashk jo aankh se nikaltaa hai
hiddat-e-gham se dil pighaltaa hai

tum jahaan ho vahaan ye yaad rakho
har sitaara jagah badaltaa hai

aql yunhi kise mili hai dost
tajraba aagahi mein Dhaltaa hai

kyaa zaruri hai saath dein saathi
yuun to saaya bhi saath chaltaa hai

itni jheli hai dil ne maayusi
laa-shuuri mein haath maltaa hai

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

badalte vaqt ne badle mizaaj bhi kaise
tiri adaa bhi gai meraa baankpan bhi gayaa