mire hijr ke faisle se Daro tum — Fariha Naqvi

ain mumkin hai use mujh se mohabbat hi na ho
dil bahar-taur use apnaa banaanaa chaahe

vo khudaa hai to bhalaa us se shikaayat kaisi?
muqtadir hai vo sitam mujh pe jo Dhaanaa chaahe

kis kis phuul ki shaadaabi ko maskh karoge bolo!!!
ye to us ki den hai jis ko chaahe vo mahkaae

andar aisaa habs thaa main ne khol diyaa darvaaza
jis ne dil se jaanaa hai vo khaamoshi se jaae

aankh aur baadal donon TuuT ke rote hain
jaane in kaa aapas mein kyaa rishta hai

tumhaare rang phike paD gae naan
miri aankhon ki viraani ke aage

apne hi fan ki aag mein jalte rahe 'shamim'
honTon pe sab ke hausla-afzaai rah gai

vahaan se hai miri himmat ki ibtidaa vallaah
jo intihaa hai tire sabr aazmaane ki

ye pyaar kaa jazba tire kuchh kaam to aae
meraa nahin bantaa hai to ban aur kisi kaa

de hausle ki daad ki ham tere gham mein aaj
baiThe hain mahfilon ko sajaae tire baghair

vo utar gae the jo paar khud mujhe biich bahr mein chhoD kar
thaa jo un mein itnaa hi hausla mujhe Dubtaa bhi to dekhte

manzil na de charaagh na de hausla to de
tinke kaa hi sahi tu magar aasraa to de