apne hi fan ki aag mein jalte rahe 'shamim' — Farooq Shamim

jhuuT sach mein koi pahchaan kare bhi kaise
jo haqiqat kaa hi meyaar fasaana Thahraa

dhuup chhuti hai badan ko jab 'shamim'
barf ke suraj pighal jaate hain kyuun

hisaar-e-zaat se kaT kar to ji nahin sakte
bhanvar ki zad se yuun mahfuz apni naav na rakh

vaqt ik mauj hai aataa hai guzar jaataa hai
Duub jaate hain jo lamhaat ubharte kab hain

hain raakh raakh magar aaj tak nahin bikhre
kaho havaa se hamaari misaal le aae

har ek lafz mein poshida ik alaao na rakh
hai dosti to takalluf kaa rakh-rakhaao na rakh

khush hote hain ham log agar koi hasina
is umr ham par koi tohmat hi lagaae

kaam kyaa hai pa nahin chaahti himmat hargiz
ghair ke ghar se diyaa kijiye raushan apnaa

chaahiye khud pe yaqin-e-kaamil
hausla kis kaa baDhaataa hai koi

kyaa asar thaa jazba-e-khaamosh mein
khud vo khich kar aa gae aaghosh mein

sitam-navaazi-e-paiham hai ishq ki fitrat
fuzul husn pe tohmat lagaai jaati hai

nahin main hausla to kar rahaa thaa
zaraa tere sukun se Dar rahaa thaa