naav na Duubi dariyaa mein — Gauhar Hoshiyarpuri

log kinaare aan lage
aur kinaara Duub gayaa

ujle maile pesh hue
jaise ham the pesh hue

phulon mein vahi to phuul Thahraa
jo tere salaam ko khilaa ho

lahja to badal chubhti hui baat se pahle
tiir aisaa to kuchh ho jise nakhchir bhi chaahe

qadam qadam koi saaya saa muttasil to rahe
saraab kaa ye sar-e-silsila daraaz to ho

kahaan vo zabt ke daave kahaan ye ham 'gauhar'
ki TuTte the na phir TuuT kar bikharte the

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

tu dariyaa hai to hogaa haan magar itnaa samajh lenaa
tire jaise kai dariyaa miri aankhon mein rahte hain

zabt-e-gham kaa mire andaaza bhalaa kyaa hotaa
main agar dasht na hotaa bhi to dariyaa hotaa

ye soch ke daanista rahaa us se bahut duur
maghrur hai dariyaa mujhe pyaasaa na samajh le

tu miri raah mein kyuun haail hai
ek umDe hue dariyaa ki tarah

sitam-e-garmi-e-sahraa mujhe maalum na thaa
khushk ho jaaegaa dariyaa mujhe maalum na thaa