is andhere mein charaagh-e-khvaab ki khvaahish nahin — Ghulam Husain Sajid

mataa-e-barg-o-samar vahi hai shabaahat-e-rang-o-bu vahi hai
khulaa ki is baar bhi chaman par giraft-e-dast-e-numu vahi hai

ek khvaahish hai jo shaayad umr bhar puuri na ho
ek sapne se hamesha pyaar karnaa hai mujhe

rukaa huun kis ke vahm mein mire gumaan mein nahin
charaagh jal rahaa hai aur koi makaan mein nahin

ham musaafir hain gard-e-safar hain magar ai shab-e-hijr ham koi bachche nahin
jo abhi aansuon mein nahaa kar gae aur abhi muskuraate palaT aaeinge

agar hai insaan kaa muqaddar khud apni miTTi kaa rizq honaa
to phir zamin par ye aasmaan kaa vajud kis qahr ke liye hai

kisi ki yaad se dil kaa andheraa aur baDhtaa hai
ye ghar mere sulagne se munavvar ho nahin saktaa

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

rang o bu mein Duube rahte the havaas
haae kyaa shai thi bahaar-e-aarzu

khvaahishon ki bijliyon ki jalti bujhti raushni
khinchti hai manzaron mein naqsha-e-aasaab saa

shaam ki chaae un ke saath piyun
dil ki hasrat bahut puraani hai

kis se ab aarzu-e-vasl karein
is kharaabe mein koi mard kahaan