rang o bu mein Duube rahte the havaas — Akhtar Ansari

us se puchhe koi chaahat ke maze
jis ne chaahaa aur jo chaahaa gayaa

samajhtaa huun main sab kuchh sirf samjhaanaa nahin aataa
taDaptaa huun magar auron ko taDpaanaa nahin aataa

ai soz-e-jaan-gudaaz abhi main javaan huun
ai dard-e-laa-ilaaj ye umr-e-shabaab hai

yaaron ke ikhlaas se pahle dil kaa mire ye haal na thaa
ab vo chaknaachur paDaa hai jis shishe mein baal na thaa

yaad-e-maazi 'azaab hai yaa-rab
chhin le mujh se haafiza meraa

ragon mein dauDti hain bijliyaan lahu ke evaz
shabaab kahte hain jis chiiz ko qayaamat hai

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

hamein miT ke bhi ye hasrat ki bhaTakte us gali mein
vo hain kaise log yaa rab jo qayaam chaahte hain

ajiib chiiz hai ye shauq-e-aarzu-mandi
hayaat miT ke rahi dil kharaab ho ke rahaa

lab pe ik harf-e-tamannaa hai gadaai to nahin
ye miri apni kamaai hai paraai to nahin

ham ne jo 'tamannaai' bayaabaan-e-talab mein
ik umr guzaari hai to do-chaar baras aur

ik vaqt thaa ki dil ko sukun ki talaash thi
aur ab ye aarzu hai ki dard-e-nihaan rahe