pahle ik shakhs meri zaat banaa — Ghulam Mohammad Qasir

pyaar gayaa to kaise milte rang se rang aur khvaab se khvaab
ek mukammal ghar ke andar har tasvir adhuri thi

is tarah qaht-e-havaa ki zad mein hai meraa vajud
aandhiyaan pahchaan leti hain ba-aasaani mujhe

saayon ki zad mein aa gaiin saari ghulaam-gardishein
ab to kaniz ke liye raah-e-faraar bhi nahin

aayaa hai ik raah-numaa ke istiqbaal ko ik bachcha
peT hai khaali aankh mein hasrat haathon mein gul-dasta hai

ham ne tumhaare gham ko haqiqat banaa diyaa
tum ne hamaare gham ke fasaane banaae hain

baghair us ke ab aaraam bhi nahin aataa
vo shakhs jis kaa mujhe naam bhi nahin aataa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

saahil saahil daar saje hain mauj mauj zanjirein hain
Dubne vaale dariyaa dariyaa jashn manaate rahte hain

ham pahaaDon ko raund aae the
jab saliqa nahin thaa chalne kaa

har mauj gale lag ke ye kahti hai Thahar jaao
dariyaa kaa ishaara hai ki ham paar utar jaaein

pahaaD bhaanp rahaa thaa mire iraade ko
vo is liye bhi ki tesha mujhe uThaanaa thaa

ye kaaenaat mire saamne hai misl-e-bisaat
kahin junun mein ulaT duun na is jahaan ko main