har mauj gale lag ke ye kahti hai Thahar jaao — Akhtar Saeed Khan

kaun jiine ke liye martaa rahe
lo sambhaalo apni duniyaa ham chale

kis ko fursat thi ki 'akhtar' dekhtaa meri taraf
main jahaan jis bazm mein jab tak rahaa tanhaa rahaa

band rakkhoge dariche dil ke yaaro kab talak
koi dastak de rahaa hai uTh ke dekho to sahi

charaagh le ke use DhunDne chalaa huun main
jo aaftaab ki maanind ik ujaalaa hai

bahut qarib rahi hai ye zindagi ham se
bahut aziiz sahi e'tibaar kuchh bhi nahin

tu kahaani hi ke parde mein bhali lagti hai
zindagi teri haqiqat nahin dekhi jaati

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

ai sanam tu vo kanhayyaa hai balaaein luun agar
baansuli ki tarah naalaan hon saraapaa ungliyaan

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gulaabon ke honTon pe lab rakh rahaa huun
use der tak sochnaa chaahtaa huun

gul kiyaa jis ne vo thaa aur magar
shama ne shikva havaaon se kiyaa