na toDo dil ki hai kaaba kaa Dhaanaa — Kishan Kumaar Waqaar

aatishin husn kyuun dikhaate ho
dil hai aashiq kaa koh-e-tur nahin

ukhDi baaton se us ki saabit hai
kuchh na kuchh aaj ghair jaD ke uThaa

tumhaare ishq-e-abru mein hilaal-e-id ki surat
hazaaron ungliyaan uTThin jidhar se ho ke ham nikle

ashk-e-hasrat hai aaj tufaan-khez
kashti-e-chashm ki tabaahi hai

chhuptaa nahin hai dil mein kabhi raaz ishq kaa
ye aag vo hai jis ko nahin taab sang mein

haath pistaan pe ghair kaa pahunchaa
aap bhi ab hue anaar-farosh

mere khvaabon ke jharokon ko sajaate rahiye
na sahi vasl magar yaad to aate rahiye

pukaaraa jab mujhe tanhaai ne to yaad aayaa
ki apne saath bahut mukhtasar rahaa huun main

soi hui taDap ko phir se jagaa rahaa hai
kahtaa to kuchh nahin hai bas yaad aa rahaa hai

dekh main yaad kar rahi huun tujhe
phir main ye bhi na kar sakun aa jaa

rah rah ke kaundti hain andhere mein bijliyaan
tum yaad kar rahe ho ki yaad aa rahe ho tum

ik baar aur meri ayaadat ko aaiye
achchhi tarah se main abhi achchhaa huaa nahin