hijr ki masaafat mein saath tu rahaa har dam — Ikram Mujeeb

is hasin manzar se dukh kai ubharne hain
dhuup jab utarni hai barf ke makaanon par

kam zaraa na hone di ek lafz ki hurmat
ek ahd ki saari umr paasdaari ki

kis qadar gunaahon ke murtakib hue hain ham
jo sukun luTtaa hai baar baar is ghar kaa

ek dard ki lazzat barqaraar rakhne ko
kuchh latif jazbon ki khuun se aabyaari ki

vo jin ki hijraton ke aaj bhi kuchh daagh raushan hain
unhi bichhDe parindon ko shajar vaapas bulaataa hai

khiDki kaa ye bhaari parda
hijr mein malmal ho jaataa hai

ab aa bhi jaao ki ik dusre mein gum ho jaaein
visaal-o-hijr kaa qissa bahut puraanaa huaa

yaa-rab gham-e-hijraan mein itnaa to kiyaa hotaa
jo haath jigar par hai vo dast-e-duaa hotaa

nuqta-e-injimaad ko pahunchaa
mausam-e-hijr dard-e-tanhaai

honaa hai dard-e-ishq se gar lazzat-aashnaa
dil ko kharaab-e-talkhi-e-hijraan to kijiye