khiDki kaa ye bhaari parda — Kamran Nafees

dil dhaDakne kaa sabab zindagi ho sakti hai
ye zaruri to nahin hai ki tiri yaad hi ho

kal dopahar ko saath rahaa thaa vo der tak
phir us ke baa'd shaam rahi shaam hi rahi

hamaare chaak-e-garebaan kaa taar thaa ye kabhi
ye jis pharere ko nikle hain aap lahraane

ek hi dar thaa gali mein vo bhi darvaaza huaa
jab se har aavaaz par be-kaar mein khulne lagaa

vo ik aavaaz thi manzil nahin thi
magar main us ki jaanib chal paDaa thaa

aa jaati hain kuchh khushiyaan andeshon mein
kuchh andeshe khushiyon mein aa jaate hain

abhi to ek vatan chhoD kar hi nikle hain
hanuz dekhni baaqi hain hijratein kyaa kyaa

ab to khvaahish bhi yahi hai ki hamaare hisse
hijr aayaa hai faqat hijr hi aataa jaae

shab o roz jaise Thahar gae koi naaz hai na niyaaz hai
tire hijr mein ye pataa chalaa miri umr kitni daraaz hai

vo ik lamha jo tere vasl kaa thaa
bayaaz-e-hijr par likkhaa huaa hai

ab dard bhi ik had se guzarne nahin paataa
ab hijr mein vo pahli si vahshat nahin hoti

khvaab ke jaisaa na paayaa khvaab ki taa'bir se
dard vahshat hijr sahraa hi milaa taqdir se