ab aa bhi jaao ki ik dusre mein gum ho jaaein — Athar Nadir

aadmi kaa amal se rishta hai
kaam aataa nahin nasab kuchh bhi

kis darja mire shahr ki dilkash hai fazaa bhi
maanus har ik chiiz hai miTTi bhi havaa bhi

dekho to har ik rang se miltaa hai miraa rang
socho to har ik baat hai auron se judaa bhi

raat aangan mein chaand utraa thaa
tum mile the ki khvaab dekhaa thaa

gham-gusaari ke liye ab nahin aataa hai koi
zakhm bhar jaane kaa imkaan na huaa thaa so huaa

jo dekhiye to zamaana hai tez-rau kitnaa
tulu-e-subh abhi hai to vaqt-e-shaam abhi

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

aasaan nahin insaaf ki zanjir hilaanaa
duniyaa ko jahaangir kaa darbaar na samjho

ham ne maanaa ik na ik din lauT ke tu aa jaaegaa
lekin tujh bin umr jo guzri kaun use lauTaaegaa

paDosi piTte hain jab dariche aur darvaaze
main Thumri chheD detaa huun taraanaa chhoD detaa huun

pahaaD bhaanp rahaa thaa mire iraade ko
vo is liye bhi ki tesha mujhe uThaanaa thaa