'azim log the TuuTe to ik vaqaar ke saath — Iqbal Ashhar

vo kisi ko yaad kar ke muskuraayaa thaa udhar
aur main naadaan ye samjhaa ki vo meraa huaa

aaj phir niind ko aankhon se bichhaDte dekhaa
aaj phir yaad koi choT puraani aai

muddaton baa'd mayassar huaa maan kaa aanchal
muddaton baa'd hamein niind suhaani aai

na jaane kitne charaaghon ko mil gai shohrat
ik aaftaab ke be-vaqt Duub jaane se

le gaiin duur bahut duur havaaein jis ko
vahi baadal thaa miri pyaas bujhaane vaalaa

suno samundar ki shokh lahro havaaein Thahri hain tum bhi Thahro
vo duur saahil pe ek bachcha abhi gharaunde banaa rahaa hai

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

dard aaluda-e-darmaan thaa 'ravish'
dard ko dard banaayaa ham ne

yaarab tu us ke dil se sadaa rakhiyo gham ko duur
jis ne kisi ke dil ko kabhi shaadmaan kiyaa