mohabbaton ko bhi us ne khataa qaraar diyaa — Iqbal Kaifi

guhar samjhaa thaa lekin sang niklaa
kisi kaa zarf kitnaa tang niklaa

dekhaa hai mohabbat ko ibaadat ki nazar se
nafrat ke avaamil hamein maayub rahe hain

amn 'kaifi' ho nahin saktaa kabhi
jab talak zulm-o-sitam maujud hai

khizaan kaa daur bhi aataa hai ek din 'kaifi'
sadaa-bahaar kahaan tak darakht rahte hain

phulon kaa tabassum bhi vo pahlaa saa nahin hai
gulshan mein bhi chalti hai havaa aur tarah ki

main aise husn-e-zan ko khudaa maantaa nahin
aahon ke ehtijaaj se jo maavaraa rahe

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sabhi se jab mohabbat chaahte ho
mohabbat kyon nahin karte sabhi se

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa