saare khvaabon ke intiqaal ke baa'd — Irshad Khan Sikandar

muddaton aankhein vazu karti rahin ashkon se
tab kahin jaa ke tiri diid ke qaabil huaa main

tum ne dekhaa nahin adaakaaron
un kaa chehra mire savaal ke baa'd

zamaane par to khul kar hans rahaa thaa
tire chhute hi ro baiThaa hai paagal

hamin tum se hamesha milne aaein kyuun
tumhaare paanv mein mehndi lagi hai kyaa

kar gayaa khamosh mujh ko der tak
chikhnaa vo ek be-zabaan kaa

mujh ko miTTi mein boyaa gayaa
meri miTTi shajar ho gai

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

be-khabar phuul ko bhi khinch ke patthar pe na maar
ki dil-e-sang mein khvaabida sanam hotaa hai

murjhaae hue gul par ik buund hai shabnam ki
taa'bir ki palkon par ik khvaab kaa aansu hai

kabhi jo yaar ko dekhaa to khvaab mein dekhaa
miri muraad bhi aai to mustaaar aai

puraane khvaabon se reza reza badan huaa hai
ye chaahtaa huun ki ab nayaa koi khvaab dekhun