saari duniyaa ke khayaalaat the dil mein lekin — Jaleel Manikpuri

aaj hai vo bahaar kaa mausam
phuul toDun to haath jaam aae

pyaari surat vo haae kyaa hogi
jis ko be-dekhe pyaar aataa hai

sote mein vo jo mujh se ham-aaghosh ho gae
jitne gile the khvaab-e-faraamosh ho gae

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

mohabbat ek taraf se mazaa nahin deti
kuchh iztiraab tujhe ho kuchh iztiraab mujhe

jo tire ishq mein tabaah huaa
koi us ko tabaah kar na sakaa

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

tu kuchh bhi ho kab tak tujhe ham yaad kareinge
taa-hashr to ye dil bhi dhaDaktaa na rahegaa

baiThe baiThe mujhe aayaa hai gunaahon kaa khayaal
shaayad tiri rahmat ne mujhe yaad kiyaa hai

yunhi har shaam agar aap ko ham yaad rahein
sohbatein garm rahein mahfilein aabaad rahein

vo ayaadat ke liye aae hain lo aur sahi
aaj hi khubi-e-taqdir se haal achchhaa hai