ajnabiyon se dhoke khaanaa phir bhi samajh mein aataa hai — Jameeluddin Aali

na tire sivaa koi likh sake na mire sivaa koi paDh sake
ye huruf-e-be-varaq-o-sabaq hamein kyaa zabaan sikhaa gae

kuchh chhoTe chhoTe dukh apne kuchh dukh apne azizon ke
in se hi jivan bantaa hai so jivan ban jaaegaa

jaise saahil se chhuDaa leti hain maujein daaman
kitnaa saada hai tiraa mujh se gurezaan honaa

tere khayaal ke divaar-o-dar banaate hain
ham apne ghar mein bhi teraa hi ghar banaate hain

ek ajiib raag hai ek ajiib guftugu
saat suron ki aag hai aaThvin sur ki justuju

jaane kyuun logon ki nazrein tujh tak pahunchin ham ne to
barson baa'd ghazal ki rau mein ik mazmun nikaalaa thaa

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

jaan-ba-lab lamha-e-taskin miri qismat hai 'shamim'
be-khudi phir mujhe divaana banaati kyuun hai

kabhi kabhi arz-e-gham ki khaatir ham ik bahaanaa bhi chaahte hain
jab aansuon se bhari hon aankhein to muskuraanaa bhi chaahte hain