hujum-e-naaz mein jalva-farebiyon ke sivaa — Kaleem Ahmadabadi

gham natija hai khushi ki intihaa kaa ai 'kalim'
dil ki ik ik mauj mauj-e-shaadmaani ho to kyaa

jaane kyaa bhar di hain us ne is chaman mein shokhiyaan
jo bhi aayaa vo chaman kaa raaz-daan bantaa gayaa

tumhin bataao ki is dil kaa kyaa kiyaa jaae
jo choT khaa ke bhi choTon se aashnaa na huaa

sitaare toD liye ham ne zuhd-o-taqvaa ke
magar jo haqq-e-ibaadat thaa vo adaa na huaa

ham to baiThe hi rahe apni asiri ko liye
banne vaalaa kaam be-vahm-o-gumaan bantaa gayaa

sard aahon kaa tasarruf ho to soz-e-dil kahaan
dil se jo shoala uThaa vo bhi dhuaan bantaa gayaa

fareb-e-ahd-e-mohabbat ki saadgi ki qasam
vo jhuuT bol ki sach ko bhi pyaar aa jaae

vafaa par naaz ham ko un ko apni bevafaai par
koi munh aaine mein dekhtaa hai koi paani mein

ye adaa-e-be-niyaazi tujhe bevafaa mubaarak
magar aisi be-rukhi kyaa ki salaam tak na pahunche

duniyaa ne teri yaad se begaana kar diyaa
tujh se bhi dil-fareb hain gham rozgaar ke

fareb-e-aarzu ki sahl-angaari nahin jaati
ham apne dil ki dhaDkan ko tiri aavaaz-e-paa samjhe

in vafaadaari ke vaadon ko ilaahi kyaa huaa
vo vafaaein karne vaale bevafaa kyuun ho gae