sitaare toD liye ham ne zuhd-o-taqvaa ke — Kaleem Ahmadabadi

gham natija hai khushi ki intihaa kaa ai 'kalim'
dil ki ik ik mauj mauj-e-shaadmaani ho to kyaa

jaane kyaa bhar di hain us ne is chaman mein shokhiyaan
jo bhi aayaa vo chaman kaa raaz-daan bantaa gayaa

tumhin bataao ki is dil kaa kyaa kiyaa jaae
jo choT khaa ke bhi choTon se aashnaa na huaa

ham to baiThe hi rahe apni asiri ko liye
banne vaalaa kaam be-vahm-o-gumaan bantaa gayaa

khud kham-o-pech tujhe raah ke batlaa deinge
teri Thokar mein tiraa sud-o-ziyaan hai ki nahin

sard aahon kaa tasarruf ho to soz-e-dil kahaan
dil se jo shoala uThaa vo bhi dhuaan bantaa gayaa

ye shafaq chaand sitaare nahin achchhe lagte
tum nahin ho to nazaare nahin achchhe lagte

mahakte phuul sitaare damaktaa chaand dhanak
tire jamaal se kitnon ne istifaada kyaa

kis dil se karun vidaaa tujh ko
TuuTaa jo sitaara bujh gayaa hai

main ne karni hai sitaaron se koi raaz ki baat
abhi kuchh aur mire qad ko baDhaayaa jaae

hamein har aane vaalaa zakhm-e-taaza de ke jaataa hai
hamaare chaand suraj aur sitaare ek jaise hain

ab ban ke falak-zaad dikhaate hain hamein aankh
zarre vahi kal jin ko uchhaalaa thaa hamin ne