ham to baiThe hi rahe apni asiri ko liye — Kaleem Ahmadabadi

gham natija hai khushi ki intihaa kaa ai 'kalim'
dil ki ik ik mauj mauj-e-shaadmaani ho to kyaa

jaane kyaa bhar di hain us ne is chaman mein shokhiyaan
jo bhi aayaa vo chaman kaa raaz-daan bantaa gayaa

tumhin bataao ki is dil kaa kyaa kiyaa jaae
jo choT khaa ke bhi choTon se aashnaa na huaa

sitaare toD liye ham ne zuhd-o-taqvaa ke
magar jo haqq-e-ibaadat thaa vo adaa na huaa

khud kham-o-pech tujhe raah ke batlaa deinge
teri Thokar mein tiraa sud-o-ziyaan hai ki nahin

sard aahon kaa tasarruf ho to soz-e-dil kahaan
dil se jo shoala uThaa vo bhi dhuaan bantaa gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi