vafaa par naaz ham ko un ko apni bevafaai par — Natiq Gulavthi

mujh se naaraaz hain jo log vo khush hain un se
main judaa chiiz huun 'naatiq' mire ashaar judaa

hangaama-e-hayaat se lenaa to kuchh nahin
haan dekhte chalo ki tamaashaa hai raah kaa

vahaan se le gai naakaam badbakhton ko khud-kaami
jahaan chashm-e-karam se khud-ba-khud kuchh kaam honaa thaa

aati hai yaad subh-e-masarrat ki baar baar
khurshid aate aate use kal uThaa to laa

sab ko ye shikaayat hai ki hanstaa nahin 'naatiq'
ham ko ye taajjub ki vo giryaan nahin hotaa

kuchh nahin achchhaa to duniyaa mein buraa bhi kuchh nahin
kijiye sab kuchh magar apni zarurat dekh kar

dil vo kaafir hai ki mujh ko na diyaa chain kabhi
bevafaa tu bhi ise le ke pashemaan hogaa

kisi tarah din to kaT rahe hain fareb-e-ummid khaa rahaa huun
hazaar-haa naqsh aarzu ke banaa rahaa huun miTaa rahaa huun

fareb-e-maah-o-anjum se nikal jaaein to achchhaa hai
zaraa suraj ne karvaT li ye taare Duub jaaeinge

ham to tamaam umr tiri hi adaa rahe
ye kyaa huaa ki phir bhi hamin bevafaa rahe

pyaar ki khud-farebiyaan tauba
miTte miTte bhi aas rahti hai

fughaan ki mujh gharib ko hayaat kaa ye hukm hai
samajh har ek raaz ko magar fareb khaae jaa