nai bahron mein ye misron ke pech-o-kham banaataa hai — Khalid Irfan

kaisaa ajiib aayaa hai is saal kaa bajaT
murghi kaa jo bajaT hai vahi daal kaa bajaT

jo tum parfum mein Dupki lagaa kar roz aati ho
fazaa tum se moattar hai havaa mein kuchh nahin rakkhaa

jo lughat ko toD-maroD de jo ghazal ko nasr se joD de
main vo bad-mazaaq-e-sukhan nahin vo jadidiyaa koi aur hai

election phir vo zil-hijj ke mahine mein karaaeinge
to kyaa do daant ke voter ki phir qurbaaniyaan hongi

main ne bas itnaa hi likhaa i-love-you aur phir
us ne aage kar diyaa thaa gaal internet par

do chaar din se meri samaaat block thi
tum ne ghazal paDhi to miraa kaan khul gayaa

na tum hosh mein ho na ham hosh mein hain
chalo mai-kade mein vahin baat hogi

kahaan milegi misaal meri sitamgari ki
ki main gulaabon ke zakhm kaanTon se si rahaa huun

niind kaa halkaa gulaabi saa khumaar aankhon mein thaa
yuun lagaa jaise vo shab ko der tak soyaa nahin

shukr hai jaama se baahar vo huaa ghusse mein
jo ki parde mein bhi uryaan na huaa thaa so huaa

rindon ko paabandi-e-duniyaa kahaan
kashti-e-mai ko nahin langar ki chaah

maston mein phuuT paD gai aate hi yaar ke
laDtaa hai aaj shishe se shisha sharaab kaa