ye dil had se guzarnaa chaahtaa thaa — Khawer Eijaz

mire aur us ke biich ik dhund si maujud rahti hai
ye duniyaa aa rahi hai mere us ke darmiyaan shaayad

badal liyaa hai zaraa khvaab ke ilaaqe ko
makaan ko chhoD ke ab laa-makaan mein rahtaa huun

sunaa rahi hai jise joD joD kar duniyaa
tamaam TukDe hain vo meri daastaan ke hi

mire sehan par khulaa aasmaan rahe ki main
use dhuup chhaanv mein baanTanaa nahin chaahtaa

jahaan tum ho vahaan se duur paDti hai zamin meri
jahaan main huun vahaan se aasmaan nazdik paDtaa hai

mujhe is khvaab ne ik arse tak be-taab rakkhaa hai
ik unchi chhat hai aur chhat par koi mahtaab rakkhaa hai

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

main jinhein dil pe khaae phirtaa huun
tire hisse ke ranj the maulaa

ishq tu bhi zaraa Tikaa le kamar
dil bhi ab so gayaa hai raat gae

milegaa ghair bhi un ke gale ba-shauq ai dil
halaal karne mujhe iid kaa hilaal aayaa

pi ke bairaag ki udaasi suun
dil pe mere sadaa udaasi hai