badal liyaa hai zaraa khvaab ke ilaaqe ko — Khawer Eijaz

mire aur us ke biich ik dhund si maujud rahti hai
ye duniyaa aa rahi hai mere us ke darmiyaan shaayad

ye dil had se guzarnaa chaahtaa thaa
magar majbur ho kar rah gayaa hai

sunaa rahi hai jise joD joD kar duniyaa
tamaam TukDe hain vo meri daastaan ke hi

mire sehan par khulaa aasmaan rahe ki main
use dhuup chhaanv mein baanTanaa nahin chaahtaa

jahaan tum ho vahaan se duur paDti hai zamin meri
jahaan main huun vahaan se aasmaan nazdik paDtaa hai

mujhe is khvaab ne ik arse tak be-taab rakkhaa hai
ik unchi chhat hai aur chhat par koi mahtaab rakkhaa hai

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

maashuq kaun saa hai na ho dil mein jis ki yaad
is mukhtasar se baagh mein kis gul ki bu nahin

vo kahaan dard jo dil mein tire mahdud rahaa
dard vo hai jo dil-e-kaun-o-makaan tak pahunche

khun-e-dil sarf kar rahaa huun 'ravish'
khuub se naqsh-e-khub-tar ke liye

tumhaaraa naam kisi ajnabi ke lab par thaa
zaraa si baat thi dil ko magar lagi hai bahut