havaa to hai hi mukhaalif mujhe Daraataa hai kyaa — Khurshid Talab

koi charaag jalaataa nahin saliqe se
magar sabhi ko shikaayat havaa se hoti hai

roz divaar mein chun detaa huun main apni anaa
roz vo toD ke divaar nikal aati hai

hamein har vaqt ye ehsaas daaman-gir rahtaa hai
paDe hain Dher saare kaam aur mohlat zaraa si hai

miri mushkil miri mushkil nahin hai
vasila teri aasaani kaa main huun

khudaa ne bakhshaa hai kyaa zarf mom-batti ko
pighalte rahnaa magar saari raat chup rahnaa

havaa se kah do ki kuchh der ko Thahar jaae
khajil hamaari ibaarat havaa se hoti hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

shab mein dekhi hain paDi paanv mein zanjirein do
yaaro is khvaab ki tum hi mujhe taabirein do

'razaa' hamaari in aankhon ke paas kuchh bhi nahin
bas ek raat hai jo baar-baar Dhalti hai