main khaandaan ki paabandiyon se vaaqif thi — Komal Joya

ab kisi aur taraf baat ghumaane vaale
main samajhti huun tiri baat kaa matlab samjhe

andhere kamre mein raqs karti rahegi vahshat
aur ek kone mein paarsaai paDi rahegi

mansub charaaghon se taraf-daar havaa ke
tum log munaafiq ho munaafiq bhi balaa ke

ek din tujh ko aachaanak ye khabar aaegi
tere bimaar shifaa-yaab nahin ho paae

savaal kaun uThaaegaa munsifon pe huzur
bari hue sabhi mujrim gavaah qaid mein hai

ai ahl-e-vafaa khaak bane kaam tumhaaraa
aaghaaz bataa detaa hai anjaam tumhaaraa

pheink de khushk phuul yaadon ke
zid na kar tu bhi be-vafaa ho jaa

bahan ki iltijaa maan ki mohabbat saath chalti hai
vafaa-e-dostaan bahr-e-mashaqqat saath chalti hai

vo kabhi dhoka nahin khaaegaa
bevafaa banda-shanaas aaj bhi hai

ham se baDhi masaafat-e-dasht-e-vafaa ki ham
khud hi bhaTak gae jo kabhi raasta milaa

tere dukh ko paa kar ham to apnaa dukh bhi bhuul gae
kis ko khabar thi teri khamoshi tah-dar-tah ik tufaan hai