har lamha maangte hain duaa did-e-yaar ki — Kunwar Mahendra Singh Bedi Sahar

gham-e-sud-o-ziyaan se be-niyaazaana nikaltaa hai
baDi farzaangi se teraa divaana nikaltaa hai

pareshaan the tiri mahfil se baahar
pashemaan hain tiri mahfil mein aa kar

ham un ke sitam ko bhi karam jaan rahe hain
aur vo hain ki is par bhi buraa maan rahe hain

in shokh hasinon ki niraali hai adaa bhi
but ho ke samajhte hain ki jaise hain khudaa bhi

kisi ik-aadh mai-kash se khataa kuchh ho gai hogi
magar kyuun mai-kade kaa mai-kada bad-naam hai saaqi

abhi vo kamsin ubhar rahaa hai abhi hai us par shabaab aadhaa
abhi jigar mein khalish hai aadhi abhi hai mujh par itaab aadhaa

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

jab ki pahlu se yaar uThtaa hai
dard be-ikhtiyaar uThtaa hai

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

barseingi aaj rahmatein aamad hai yaar ki
naayaab hain ye ghaDiyaan tire intizaar ki

ham se agar hai tark-e-taalluq to kyaa huaa
yaaro koi to un ki khabar puchhte chalo

barg-e-gul aa main tere bose luun
tujh mein hai Dhang yaar ke lab kaa