samjhaa liyaa fareb se mujh ko to aap ne — Lala Madhav Ram Jauhar

ai dost tujh ko rahm na aae to kyaa karun
dushman bhi mere haal pe ab aab-dida hai

apni zabaan se mujhe jo chaahe kah lein aap
baDh baDh ke bolnaa nahin achchhaa raqib kaa

jab kahte hain ham karte ho kyuun vaada-khilaafi
farmaate hain hans kar ye nai baat nahin hai

us ne phir kar bhi na dekhaa main use dekhaa kiyaa
de diyaa dil raah chalte ko ye main ne kyaa kiyaa

mal rahe hain vo apne ghar mehndi
ham yahaan eDiyaan ragaDte hain

vahi shaagird phir ho jaate hain ustaad ai 'jauhar'
jo apne jaan-o-dil se khidmat-e-ustaad karte hain

bevafaai kaa mujhe ilzaam detaa thaa vo shakhs
main ne bhi itnaa kiyaa bas us ko sachchaa kar diyaa

main kis tarah tujhe ilzaam-e-bevafaai duun
rah-e-vafaa mein tire naqsh-e-paa bhi milte hain

ye raqibon ki hai sukhan-saazi
be-vafaa aap hon khudaa na kare

hasti kaa zarra zarra taaraaj kar diyaa hai
us bevafaa ki khaatir us bevafaa ke gham mein

aksar aisaa bhi mohabbat mein huaa kartaa hai
ki samajh-bujh ke khaa jaataa hai dhokaa koi

umr bhar us ne bevafaai ki
umr se bhi vo baa-vafaa na rahaa