mujh se dilli ki nahin dil ki kahaani suniye — Mansoor Usmani

haalaat kyaa ye tere bichhaDne se ho gae
lagtaa hai jaise ham kisi mele mein kho gae

aankhon se mohabbat ke ishaare nikal aae
barsaat ke mausam mein sitaare nikal aae

jahaan jahaan koi urdu zabaan boltaa hai
vahin vahin miraa hindostaan boltaa hai

apni taarif suni hai to ye sach bhi sun le
tujh se achchhaa tiraa kirdaar nahin ho saktaa

pahle to us ki yaad ne sone nahin diyaa
phir us ki aahaTon ne kahaa jaagte raho

shabnam ki jagah aag ki baarish ho magar ham
'mansur' na maangeinge duaa aur tarah ki

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

dil ki tamannaa thi masti mein manzil se bhi duur nikalte
apnaa bhi koi saathi hotaa ham bhi bahakte chalte chalte

mujh se kahaa jibril-e-junun ne ye bhi vahi-e-ilaahi hai
mazhab to bas mazhab-e-dil hai baaqi sab gumraahi hai

fareb-e-saaqi-e-mahfil na puchhiye 'majruh'
sharaab ek hai badle hue hain paimaane