pahle to us ki yaad ne sone nahin diyaa — Mansoor Usmani

haalaat kyaa ye tere bichhaDne se ho gae
lagtaa hai jaise ham kisi mele mein kho gae

aankhon se mohabbat ke ishaare nikal aae
barsaat ke mausam mein sitaare nikal aae

mujh se dilli ki nahin dil ki kahaani suniye
shahr to ye bhi kai baar luTaa hai mujh mein

jahaan jahaan koi urdu zabaan boltaa hai
vahin vahin miraa hindostaan boltaa hai

apni taarif suni hai to ye sach bhi sun le
tujh se achchhaa tiraa kirdaar nahin ho saktaa

shabnam ki jagah aag ki baarish ho magar ham
'mansur' na maangeinge duaa aur tarah ki

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

yaad karte hain tujhe dair-o-haram mein shab-o-roz
ahl-e-tasbih judaa saahib-e-zunnaar judaa

khushi se apnaa ghar aabaad kar ke
bahut roeinge tum ko yaad kar ke

jab yaad mein taDpein to mohabbat ko baDhaa dein
khud dard-e-mohabbat ki masihaai mohabbat

kisi ko yaad karne ke nahin makhsus kuchh lamhe
koi jab yaad aa jaae to phir vo yaad aataa hai