kahin kahin koi taara kahin kahin jugnu — Meena Kumari Naz

ayaadat ko aae shifaa ho gai
miri ruuh tan se judaa ho gai

tere qadmon ki aahaT ko ye dil hai DhunDtaa har dam
har ik aavaaz par ik thartharaahaT hoti jaati hai

puchhte ho to suno kaise basar hoti hai
raat khairaat ki sadqe ki sahar hoti hai

shama huun phuul huun yaa ret pe qadmon kaa nishaan
aap ko haq hai mujhe jo bhi ji chaahe kah lein

aaghaaz to hotaa hai anjaam nahin hotaa
jab meri kahaani mein vo naam nahin hotaa

hansi thami hai in aankhon mein yuun nami ki tarah
chamak uThe hain andhere bhi raushni ki tarah

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

bikhar ke jaataa kahaan tak ki main to khushbu thaa
havaa chali thi mujhe apne ham-rikaab liye

raat hi ke daaman mein chaand bhi hain taare bhi
raat hi ki qismat hai be-charaagh honaa bhi

kuchh to ho raat ki sarhad mein utarne ki sazaa
garm suraj ko samundar mein Duboyaa jaae