ham hain tahzib ke alam-bardaar — Mohammad Ali Sahil

meri aankhon mein hue raushan jo ashkon ke charaagh
un ke honTon par tabassum kaa diyaa jaltaa rahaa

duur rahti hain sadaa un se balaaein saahil
apne maan baap ki jo roz duaa lete hain

khaamushi teri miri jaan liye leti hai
apni tasvir se baahar tujhe aanaa hogaa

masale to zindagi mein roz aate hain magar
zindagi ke masalon kaa hal nikalnaa chaahiye

marte dam tak sab mujh ko insaan kahein
aisaa hi kirdaar miraa ho yaa-allaah

meri nindein haraam kyaa hongi
ghar mein rizq-e-halaal aataa hai

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

bas tiraa huun ye soch kar barson
main ne apnaa khayaal rakkhaa hai

ham 'jaun-eliyaa' ke zamaane mein dosto
'ghaalib' kaa intikhaab liye sochte rahe

daur-e-ishrat ne sanvaare hain ghazal ke gesu
fikr ke pahlu magar gham ki badaulat aae

ham ne ye soch ke chheDaa thaa fasaana gul kaa
is bahaane hi tire zikr kaa pahlu nikle