kyaa karein bolti in aankhon kaa — M.S Mahawar

mar gai band lifaafe mein mohabbat meri
sirf usi ne na paDhe jis ko paDhaane the khat

tujhe itnaa to dekhaa bhi nahin hai
tujhe ham yaad jitnaa kar rahe hain

vasl ke din gine hain ungli par
hijr kaa koi bhi hisaab nahin

chun liyaa hai tumhein miraa mahbub
dusraa koi intikhaab nahin

hijr kaa dukh nahin rahaa hamein ab
hai ye dukh ab koi azaab nahin

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

ye soch kar tiri mahfil se ham chale aae
ki ek baar to baDh jaae hausla dil kaa

is tarah kuchh badal gai hai zamin
ham ko ab khauf-e-aasmaan na rahaa

tum zamaane ki raah se aae
varna sidhaa thaa raasta dil kaa