hijr kaa dukh nahin rahaa hamein ab — M.S Mahawar

mar gai band lifaafe mein mohabbat meri
sirf usi ne na paDhe jis ko paDhaane the khat

tujhe itnaa to dekhaa bhi nahin hai
tujhe ham yaad jitnaa kar rahe hain

vasl ke din gine hain ungli par
hijr kaa koi bhi hisaab nahin

chun liyaa hai tumhein miraa mahbub
dusraa koi intikhaab nahin

kyaa karein bolti in aankhon kaa
haal dil kaa chhupaa nahin sakte

ai shab-e-hijraan ziyaada paanv phailaati hai kyuun
bhar gayaa jitnaa hamaari umr kaa paimaana thaa

raat thaa vasl aaj hijr kaa din
kuchh zamaane kaa e'tibaar nahin

hijr mein us but-e-kaafir ke taDapte hain paDe
ahl-e-zunnaar kahin saahib-e-islaam kahin

'faraaz' ishq ki duniyaa to khub-surat thi
ye kis ne fitna-e-hijr-o-visaal rakkhaa hai

hijr mein muskuraae jaa dil mein use talaash kar
naaz-e-sitam uThaae jaa raaz-e-sitam na faash kar

use khabar thi ki ham visaal aur hijr ik saath chaahte hain
to us ne aadhaa ujaaD rakkhaa hai aur aadhaa banaa diyaa hai