tujhe itnaa to dekhaa bhi nahin hai — M.S Mahawar

mar gai band lifaafe mein mohabbat meri
sirf usi ne na paDhe jis ko paDhaane the khat

vasl ke din gine hain ungli par
hijr kaa koi bhi hisaab nahin

chun liyaa hai tumhein miraa mahbub
dusraa koi intikhaab nahin

kyaa karein bolti in aankhon kaa
haal dil kaa chhupaa nahin sakte

hijr kaa dukh nahin rahaa hamein ab
hai ye dukh ab koi azaab nahin

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

kisi sayyaad ki paD jaae na chiDiyaa pe nazar
aap sarkaaein na mahram se dupaTTaa apnaa

tujh ko bhi kyuun yaad rakhaa
soch ke ab pachhtaate hain

tum apne Thor-Thikaanon ko yaad rakkho 'saaz'
hamaaraa kyaa hai ki ham to kahin bhi rahte hain

jal uThein yaadon ki qindilein sadaaein Duub jaaein
dar-haqiqat khaamushi sahraa bhi hai dariyaa bhi hai