chaltaa rahe jo aabla-paai ke baavajud — Murtaza Barlas

dushman-e-jaan hi sahi dost samajhtaa huun use
bad-duaa jis ki mujhe ban ke duaa lagti hai

mujhe ki gai hai ye peshkash ki sazaa mein hongi riyaayatein
jo qusur main ne kiyaa nahin vo qubul kar luun dabaao mein

naam is kaa aamariyyat ho ki ho jamhuriyat
munsalik firauniyat masnad se tab thi ab bhi hai

maanaa ki teraa mujh se koi vaasta nahin
milne ke baa'd mujh se zaraa aaina bhi dekh

chehre ki chaandni pe na itnaa bhi maan kar
vaqt-e-sahar tu rang kabhi chaand kaa bhi dekh

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

asaatiza ne miraa haath thaam rakkhaa hai
isi liye to main pahunchaa huun apni manzil par

lailaa chali thi haj ke liye jazb-e-ishq se
naaqa machal ke najd ki manzil mein rah gayaa