aangan mein ye raat ki raani saanpon kaa ghar kaaT ise — Muzaffar Hanfi

roti hui ek bhiiD mire gird khaDi thi
shaayad ye tamaasha mire hansne ke liye thaa

shukriya reshmi dilaase kaa
tiir to aap ne bhi maaraa thaa

bachpan mein aakaash ko chhutaa saa lagtaa thaa
is pipal ki shaakhein ab kitni nichi hain

bataaein kyaa ki bechaini baDhaate hain vahi aa kar
bahut bechain ham jin ke liye maalum hote hain

ai muzaffar kis liye bhopal yaad aane lagaa
kyaa samajhte the ki dilli mein na hogaa aasmaan

bheDiye aur ishtiraak-shudaa
biich mein ik hiran halaak-shudaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

kisi sitaare se kyaa shikaayat ki raat sab kuchh bujhaa huaa thaa
fasurdagi likh rahi thi dil par shikastagi ki nai kahaani

hijr ki raat aur puuraa chaand
kis qadar hai ye ehtimaam ghalat

ek tahrir jo us ke haathon ki thi
baat vo mujh se karti rahi raat bhar