bachpan mein aakaash ko chhutaa saa lagtaa thaa — Muzaffar Hanfi

aangan mein ye raat ki raani saanpon kaa ghar kaaT ise
kamra albatta suunaa hai kone mein guldaan lagaa

roti hui ek bhiiD mire gird khaDi thi
shaayad ye tamaasha mire hansne ke liye thaa

shukriya reshmi dilaase kaa
tiir to aap ne bhi maaraa thaa

bataaein kyaa ki bechaini baDhaate hain vahi aa kar
bahut bechain ham jin ke liye maalum hote hain

ai muzaffar kis liye bhopal yaad aane lagaa
kyaa samajhte the ki dilli mein na hogaa aasmaan

bheDiye aur ishtiraak-shudaa
biich mein ik hiran halaak-shudaa

main baDaa ho gayaa huun magar bachpanaa
mere dil se kabhi bhi gayaa hi nahin

ek aavaaz main ne suni thi abhi kaun bolaa thaa ye to khabar hi nahin
ye ta'alluq zaruri hai kis ne kahaa vo bhi khaamosh thaa main bhi khaamosh thi

maslahat thi koi vo chup the agar
bolne vaale to khul kar bolte

teraa chup rahnaa mire zehn mein kyaa baiTh gayaa
itni aavaazein tujhe diin ki galaa baiTh gayaa

zabaan khaamosh magar nazron mein ujaalaa dekhaa
us kaa izhaar-e-mohabbat bhi niraalaa dekhaa

aurat ho tum to tum pe munaasib hai chup raho
ye bol khaandaan ki izzat pe harf hai