apne chehre ko badalnaa to bahut mushkil hai — Naseem Nikhat

mujh ko ye dar-ba-dari tu ne hi bakhshi hai magar
jab chali ghar se to main naam tiraa le ke chali

banjaare hain rishton ki tijaarat nahin karte
ham log dikhaave ki mohabbat nahin karte

maanaa ki main hazaar fasilon mein qaid huun
lekin kabhi khulus se mujh ko bulaa ke dekh

main baDaa ho gayaa huun magar bachpanaa
mere dil se kabhi bhi gayaa hi nahin

chaand ne taan li hai chaadar-e-abr
ab vo kapDe badal rahi hogi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein