maanaa ki main hazaar fasilon mein qaid huun — Naseem Nikhat

mujh ko ye dar-ba-dari tu ne hi bakhshi hai magar
jab chali ghar se to main naam tiraa le ke chali

apne chehre ko badalnaa to bahut mushkil hai
dil bahal jaaegaa aaina badal kar dekho

banjaare hain rishton ki tijaarat nahin karte
ham log dikhaave ki mohabbat nahin karte

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

apni pahchaan ke sab rang miTaa do na kahin
khud ko itnaa gham-e-jaanaan se shanaasaa na karo

saail aayaa hai tire dar pe khudi ko kho kar
dekhnaa hai mujhe kyaa aaj 'ataa hotaa hai

ham jhulas to rahe hain ai jaanaan!
teraa suraj bhi to pighaltaa hai