banjaare hain rishton ki tijaarat nahin karte — Naseem Nikhat

mujh ko ye dar-ba-dari tu ne hi bakhshi hai magar
jab chali ghar se to main naam tiraa le ke chali

apne chehre ko badalnaa to bahut mushkil hai
dil bahal jaaegaa aaina badal kar dekho

maanaa ki main hazaar fasilon mein qaid huun
lekin kabhi khulus se mujh ko bulaa ke dekh

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

baad-e-fanaa bhi hai maraz-e-ishq kaa asar
dekho ki rang zard hai mere ghubaar kaa