kuchh yaadgaar-e-shahr-e-sitamgar hi le chalein — Nasir Kazmi

vo raat kaa be-navaa musaafir vo teraa shaair vo teraa 'naasir'
tiri gali tak to ham ne dekhaa thaa phir na jaane kidhar gayaa vo

akele ghar se puchhti hai be-kasi
tiraa diyaa jalaane vaale kyaa hue

girafta-dil hain bahut aaj tere divaane
khudaa kare koi tere sivaa na pahchaane

jurm-e-ummid ki sazaa hi de
mere haq mein bhi kuchh sunaa hi de

daaem aabaad rahegi duniyaa
ham na honge koi ham saa hogaa

nae kapDe badal kar jaaun kahaan aur baal banaaun kis ke liye
vo shakhs to shahr hi chhoD gayaa main baahar jaaun kis ke liye

mere khvaabon ke jharokon ko sajaate rahiye
na sahi vasl magar yaad to aate rahiye

TimTimaate rahein bujhti hui yaadon ke charaagh
dil ki viraani pe gar aap ko israar na ho

jis ko tum bhuul ga.e yaad kare kaun us ko
jis ko tum yaad ho vo aur kise yaad kare

bas dariche se lage baiThe rahe ahl-e-safar
sabza jaltaa rahaa aur yaad-e-vatan aati rahi

khvaabon ki main ne ek imaarat banaai aur
yaadon kaa us mein ek daricha banaa liyaa

kiyaa ishq-e-majaazi ne haqiqat aashnaa mujh ko
buton ne zulm vo Dhaayaa ki yaad aaya khudaa mujh ko