rang-e-mahfil chaahtaa hai ik mukammal inqalaab — Qabil Ajmeri

raasta hai ki kaTtaa jaataa hai
faasla hai ki kam nahin hotaa

ab ye aalam hai ki gham ki bhi khabar hoti nahin
ashk bah jaate hain lekin aankh tar hoti nahin

ham badalte hain rukh havaaon kaa
aae duniyaa hamaare saath chale

tum na maano magar haqiqat hai
ishq insaan ki zarurat hai

kuchh der kisi zulf ke saae mein Thahar jaaein
'qaabil' gham-e-dauraan ki abhi dhuup kaDi hai

vaqt kartaa hai parvarish barson
haadisa ek dam nahin hotaa

har subh nikalte hain yahi soch ke ghar se
bikhri hui duniyaa ko sameTeinge kisi din

jo nahin hai vaqt kaa ham-safar use subh-o-shaam ki kyaa khabar
ho kisi kaa vaqt pe kyaa asar bhalaa vaqt kis kaa ghulaam hai

yuun ehtimaam-e-radd-e-sahar kar diyaa gayaa
har raushni ko shahr-badar kar diyaa gayaa

har subh apne ghar mein usi vaqt jaagnaa
aazaad log bhi to giraftaar se rahe

milaa thaa hijr ke raste mein subh ki maanind
bichhaD gayaa thaa musaafir se raat hone tak

is tarah chashm-e-nim-vaa ghaafil bhi thi bedaar bhi
jaise nasha ho raat kaa yaa subh kaa taDkaa huaa