ham badalte hain rukh havaaon kaa — Qabil Ajmeri

rang-e-mahfil chaahtaa hai ik mukammal inqalaab
chand shamon ke bhaDakne se sahar hoti nahin

raasta hai ki kaTtaa jaataa hai
faasla hai ki kam nahin hotaa

ab ye aalam hai ki gham ki bhi khabar hoti nahin
ashk bah jaate hain lekin aankh tar hoti nahin

tum na maano magar haqiqat hai
ishq insaan ki zarurat hai

kuchh der kisi zulf ke saae mein Thahar jaaein
'qaabil' gham-e-dauraan ki abhi dhuup kaDi hai

vaqt kartaa hai parvarish barson
haadisa ek dam nahin hotaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

ye dil kab ishq ke qaabil rahaa hai
kahaan is ko dimaagh o dil rahaa hai

dil toD diyaa us ne ye kah ke nigaahon se
patthar se jo Takraae vo jaam nahin hotaa

kis kaa hai jigar jis pe ye bedaad karoge
lo dil tumhein ham dete hain kyaa yaad karoge