tum na maano magar haqiqat hai — Qabil Ajmeri

rang-e-mahfil chaahtaa hai ik mukammal inqalaab
chand shamon ke bhaDakne se sahar hoti nahin

raasta hai ki kaTtaa jaataa hai
faasla hai ki kam nahin hotaa

ab ye aalam hai ki gham ki bhi khabar hoti nahin
ashk bah jaate hain lekin aankh tar hoti nahin

ham badalte hain rukh havaaon kaa
aae duniyaa hamaare saath chale

kuchh der kisi zulf ke saae mein Thahar jaaein
'qaabil' gham-e-dauraan ki abhi dhuup kaDi hai

vaqt kartaa hai parvarish barson
haadisa ek dam nahin hotaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

banjaare hain rishton ki tijaarat nahin karte
ham log dikhaave ki mohabbat nahin karte

kisi ke ishq mein ye haal-e-zaar rahtaa hai
sukun paa ke bhi dil be-qaraar rahtaa hai

us maraz ko maraz-e-ishq kahaa karte hain
na davaa hoti hai jis ki na duaa hoti hai

dekh kar mujh ko tujhe kyuun hai tahayyur naaseh
mashrab-e-ishq hai ye mazhab-e-islaam nahin